Niueqateqarnermi oqimaaqatigiissut

Niueqateqarnermi oqimaaqatigiissut takutinneqartarpoq avammut nioqqutit avataaniit nioqqutinik ilanngaatiginerisigut. Tunisassiat ataatsimut nalingat (BNP) naatsorsorneqartarpoq nunami tunisassiarineqartut nalingat, tunisassiamik atuinermi ilanngaannerisigut.

 

Titartagaq 1.1. Niueqateqarnerup oqimaaqatigiissutaata ineriartornera pct.-inngorlugu tunisassiat nalinganut sanilliullugu (BNP)

Najoqqutaq: Naatsorsueqqissaartarfik, kisitsisaataasivik - http://bank.stat.gl/IENBALMND aamma http://bank.stat.gl/NRN10

 

Titartagaq 1.1-ip takutippaa Niuernermi oqimaaqatigiissut 1979-miit ineriartornera. Piffissami 1979-miit 1988-mut niuernermi oqimaaqatigiissut amigartoorfiungaatsiarpoq, ukiuni ataasiakkaani tunisassiat ataatsimut nalingisa (BNP) 30 procentiat angusarlugu. Pingaartumik tamatumunnga aalisakkanik inuussutissarsiornerup iluani piffissami sivisuumi akigissaartitsineq peqqutaavoq, tamatuma kinguneralugu atortussanik nalilinnillu avataaniit eqqussuingaatsiarsimaneq. Aalisarnerup iluani ajornartorsiorneq aningaasarsiornikkut politikkip sakkortusisariaqarneranik kinguneqarpoq sanaartugassanillu suliaqarnermik unitsitsisoqarallarluni. Aningaasarsiornerup unikaallatsinneqarnerata kinguneraa 1989-imi 1990-imilu niuernermik oqimaaqatigiinnermi sinneqartuulaarneq. 1991-miik niuernermi oqimaaqatigiissut amigartoorfiugaluartoq annikinneruvoq, BNP-ip 10-20 pct. missaaniilluni.